Zelensky reagon përpara takimit me Trump: Rusia nuk duhet të shpërblehet

Presidenti i Ukrainës, Volodymyr Zelensky, ka dënuar sulmet ruse ndaj një blloku apartamentesh në Kharkiv gjatë natës, duke theksuar se Moska nuk duhet të shpërblehet për agresionin e saj ndaj vendit të tij.

Në një postim në X, Zelensky nënvizoi se Rusia është e vetëdijshme për zhvillimet diplomatike, përfshirë takimin që po zhvillohet këtë të hënë në Uashington për t’i dhënë fund luftës, dhe megjithatë ka vijuar sulmet në rajonet e Kharkivit, Zaporizhzhias, Sumyt dhe Odesës gjatë mëngjesit të sotëm.

“Makineria ruse e luftës vazhdon të shkatërrojë jetë pavarësisht gjithçkaje. Putini po kryen vrasje demonstrative për të ruajtur presionin mbi Ukrainën dhe Evropën, si dhe për të poshtëruar përpjekjet diplomatike,” shkruan Zelensky.

Ai shtoi se ndihma ndërkombëtare është thelbësore për t’i dhënë fund vrasjeve, duke theksuar nevojën për garanci të besueshme sigurie dhe duke ripërsëritur se Rusia nuk duhet të shpërblehet për pjesëmarrjen e saj në këtë luftë.

LEXONI GJITHASHTU: 

• Zelensky refuzon propozimin e Putinit për dorëzimin e rajonit të Donbasit
• Putin propozon armëpushim: Ukraina të tërhiqet nga Donbasi dhe të njohë Krimenë