Zelensky: Rusia po shantazhon botën përmes centralit atomik

Guvernatori i Zaporizhias ka bërë thirrje për demilitarizimin e impiantit bërthamor të qytetit dhe ndërhyrjen e institucioneve ndërkombëtare për ta bërë një gjë të tillë.

Ndërkohë, presidenti Volodymyr Zelenski, në mesazhin e tij të fundit tha se pushtuesit rusë po përpiqen ta përdorin impiantin për të trembur njerëzit dhe për të shantazhuar Ukrainën.

“Pushtuesit po përpiqen të trembin njerëzit në mënyrën më cinike, duke përdorur impiantin e Zaporizhias. Ata provokojnë vazhdimisht me bombardimin e territorit të centralit bërthamor dhe përpiqen t’i çojnë trupat e tyre në këtë drejtim, në mënyrë që të shantazhojnë shtetin tonë dhe gjithë botën e lirë”, tha Zelensky.

Nga ana tjetër, Ministria ruse e Mbrojtjes deklaroi se forcat e saj kanë marrë nën kontroll të plotë Piskin, një fshat në rrethinat e rajonit të Donjeckut.

Zëdhënësi Igor Konashenkov theksoi se trupat ruse kishin shkatërruar gjithashtu një sistem raketash “HIMARS” të furnizuara nga Shtetet e Bashkuara në afërsi të Kramatorskut.

Në lokalitetin në fjalë, banorët po llogarisin dëmet e shkaktuara ndaj pronave të tyre, pasi u bombarduan nga një raketë ruse. Sipas autoriteteve lokale, 3 persona mbetën të vrarë dhe 13 të plagosur.

Agresioni erdhi një ditë pas sulmit me 11 raketa që ranë në qytet, një ndër më të rëndësishmit në rajonin e Donjeckut, që është ende në duart e ukrainasve e që është në fokusin e rusëve.

LEXONI GJITHASHTU:

• Zelenski sërish thirrje BE-së: Ndaloni vizat turistike për rusët
• ‘Mos flisni publikisht për taktikat ushtarake’, Zelenski thirrje zyrtarëve