Zelensky: SHBA kërkon lëshimin e Donbasit për të garantuar sigurinë e Ukrainës

SHBA- të po e kushtëzojnë ofertën e tyre për garanci sigurie për një marrëveshje paqeje në Ukrainë me kushtin që Kievi t’ia lëshojë Rusisë të gjithë rajonin lindor të Donbasit, tha Presidenti Volodymyr Zelensky në një intervistë për Reuters.

Me SHBA-në të përqendruar në konfliktin e saj me Iranin, Presidenti Donald Trump po ushtron presion ndaj Ukrainës në një përpjekje për t’i dhënë fund shpejt luftës katërvjeçare të shkaktuar nga pushtimi i Rusisë në vitin 2022, tha Zelensky.

“Lindja e Mesme padyshim ka një ndikim te Presidenti Trump dhe mendoj se edhe te hapat e tij të ardhshëm. Presidenti Trump, për fat të keq, sipas mendimit tim, ende zgjedh një strategji për të ushtruar më shumë presion mbi palën ukrainase”, i tha ai Reuters.

Ndërkohë, SHBA-të, Rusia dhe Ukraina kanë zhvilluar tre raunde bisedimesh trepalëshe të nivelit të lartë në Abu Dhabi dhe Gjenevë këtë vit, në një përpjekje për të negociuar përfundimin e konfliktit më të përgjakshëm të Evropës që nga Lufta e Dytë Botërore, i cili ka shkatërruar pjesë të mëdha të Ukrainës dhe ka vrarë qindra mijëra njerëz.

Udhëheqësi ukrainas ka thënë vazhdimisht se nevojiten garanci të forta sigurie nga partnerët ndërkombëtarë për të siguruar që Rusia të mos rifillojë armiqësitë në të ardhmen, pasi të arrihet ndonjë marrëveshje paqeje.

Dy pyetje mbetën të pazgjidhura në lidhje me garancitë e sigurisë, tha Zelensky: Kush do të ndihmonte në financimin e blerjeve të armëve të Ukrainës për të mbështetur frenimin e saj ushtarak dhe si do të reagonin saktësisht aleatët e saj përballë çdo agresioni të ardhshëm rus?

“Amerikanët janë të përgatitur të finalizojnë këto garanci në një nivel të lartë sapo Ukraina të jetë gati të tërhiqet nga Donbasi”, tha udhëheqësi 48-vjeçar, i cili shtoi se i kuptonte “hollësitë” e qëndrimit amerikan, megjithëse nuk kishte marrë pjesë drejtpërdrejt vetë në bisedimet trepalëshe.