Zelensky: Situata në termocentralin bërthamor të Zaporizhias është kritike

Presidenti i Ukrainës, Volodymyr Zelensky, deklaroi të martën se situata në termocentralin bërthamor të Zaporizhias, i cili ndodhet nën kontrollin e forcave ruse, është bërë jashtëzakonisht kritike.

Sipas tij, bombardimet e vazhdueshme ruse kanë penguar përpjekjet për të rivendosur linjat e jashtme të furnizimit me energji elektrike të centralit.

Në mesazhin e tij të përditshëm me video, Zelensky theksoi se tashmë një nga gjeneratorët e emergjencës, që përdoret për të siguruar energji në raste ndërprerjeje, ka ndaluar së funksionuari, shtatë ditë pasi linjat kryesore të energjisë u shkëputën.

“Kjo është dita e shtatë. Asnjëherë më parë nuk ka pasur një situatë emergjente të tillë në termocentralin e Zaporizhias. Gjendja është kritike. Bombardimet ruse e kanë shkëputur uzinën nga rrjeti elektrik,” deklaroi ai.

Presidenti ukrainas paralajmëroi se situata po përkeqësohet dhe se siguria e centralit është në rrezik të madh.

“Tani kemi marrë informacion se një nga gjeneratorët ka ndaluar së punuari,” përfundoi Zelensky, duke ngritur shqetësimin për mundësinë e një katastrofe bërthamore nëse situata nuk vihet nën kontroll.

LEXONI GJITHASHTU:

• SHBA hyn zyrtarisht në mbyllje qeveritare, qindra mijëra punonjës federalë pa paga
• Vendet arabe shtojnë presionin ndaj Hamasit: Pranoni paqen