Konservatorët e linjës së ashpër kanë ruajtur kontrollin e tyre të hekurt ndaj Parlamentit, pas zgjedhjeve ku pak kandidatë reformistë u lejuan të merrnin pjesë. Rezultatet u konfirmuan të hënën, por do të ketë edhe balotazhe për disa zona. Autoritetet nuk bënë publike shifrat e pjesëmarrjes, që pritej të ishte e ulët. Kundërshtarë të regjimit thanë se abstenimi ishte forma e vetme e protestës.

“Në total, 245 persona janë zgjedhur dhe do t’i paraqiten parlamentit. Nga 208 zona administrative, 21 do të shkojnë në balotazh, pasi ka ende 45 mandate që duhet të përcaktohen”, deklaroi Mohsen Eslami, zëdhënës i Komisionit Qendror të Zgjedhjeve, Iran.

Votimet u mbajtën gjithashtu për Asamblenë e Ekspertëve, që do të vendosë pasuesin e liderit suprem iranian, Ajatollahut Khamenei.

Nëse pjesëmarrja e ulët konfirmohet, ajo do të rrisë presionin ndaj lidershipit fetar të vendit, legjitimiteti i të cilit bazohet tek pjesëmarrja në zgjedhje.