Zgjedhjet në Kosovë dhe RMV, kutitë e votimit në shtëpitë e të infektuarve me COVID

87 ekipe me gjithsej 348 anëtarë janë përgatitur për të shkuar në shtëpitë e qytetarëve në Kosovë të infektuar me COVID-19, për t’iu dhënë mundësi të votojnë.

Krahas anëtarëve të KQZ-së, çdo ekip ka një mjek dhe një polic.

Në çdo kuti votimi krahas materialeve zgjedhore kishte maska, doreza dhe dezinfektues.

Krahas ekipeve për COVID, në Kosovë u përgatitën ekipe që do të mundësojnë votimin e të moshuarve, personave me aftësi të kufizuara dhe të burgosurve.

Këto ekipe u praktikuan edhe në zgjedhjet parlamentare të 14 shkurtit 2021.

Në zgjedhjet lokale që po mbahen sot të drejtë vote kanë 1.885.448 votues.

Ndërsa, numri i qendrave të votimit në të gjithë Republikën e Kosovës është 883 me gjithsej 2.477 vendvotime.

Ndërkaq, numri i qytetarëve me të drejtë vote jashtë vendit, të cilët kanë arritur të regjistrohen suksesshëm si votues jashtë Kosovës është 15.532 votues.

Edhe në Maqedoninë e Veriut një komision zgjedhor special u vu në dispozicion të të sëmurëve me COVID-19. 7.921 persona të infektuar në të gjithë vendin do të ushtrojnë sot të drejtën e votës.

Ndërkohë në Shqipëri të prekurit nga COVID nuk iu mundësua e drejta e votës në zgjedhjet e 25 prillit.

LEXONI GJITHASHTU: 

• Votimi në RMV nis me probleme teknike
• Voton presidentja e Kosovës: Zgjedhësit kanë në dorë cilësinë e jetës së tyre
• Kandidati i Vetëvendosjes për Prishtinën: Sot një ditë e rëndësishme për demokracinë