Zgjedhjet në Rumani, rezultati i ngushtë mes dy partive kryesore, Orban pritet te formojë qeverinë

Kryeministri i qendrës së djathtë të Rumanisë, Ludovic Orban duket se do të mbetet në pushtet pas një rezultati të ngushtë në zgjedhjet e së dielës karakterizuar edhe nga një pjesëmarrje e ulët për shkak të pandemisë.

Sipas sondazheve Partia Liberale e Orbanit fitoi 29 përqind të votave, prapa Partisë Social Demokrate (PSD) të qendrës së majtë që siguroi  30.5 përqind.

Ndërkohë, Orban pritet të formojë një qeveri pasi siguron shumicën së bashku  me partinë liberale USR-PLUS, e cila pritet të fitojë 16 përqind.

“Duke vlerësuar të gjitha përqindjet e sondazheve mund të thuhet se Partia Liberale i fiton këto zgjedhje”, deklaroi Ludovic Orban.

Por, Rivali i Orban e sheh rezultatin ndryshe.

“Në këto momente sopas exitpolleve  partia social demokrate ka avantazh , po ashtu duhet të marrim parasysh edhe votat e emigrantëve, tha Marcel Ciolacu, lideri i partisë Social-demokrate.

Kryeministri Orban, nga viti i shkuar ka udhëhequr një qeveri të pakicës .

Popullariteti i tij ka rënë për shkak të  pandemisë Covid-19 e cila ka dëmtuar rëndë edhe ekonominë. Virusi ka vrarë më shumë se 12,000 qytetarë rumunë.

Nga ana tjetër lideri Social Demokrat pretendon se “rumunët kanë treguar se kane nevojë për një ndryshim”.

Sidoqoftë, partia e tij duket se do të luftojë për të gjetur aleatë të koalicionit.

Liberalët e Orban, mbështetur nga Presidenti Klaus Iohannis, i cili duhet të emërojë Kryeministrin, mbeten favoritë për të rënë dakord mbi një koalicion.

Prej vitesh Rumania është tronditur nga trazira politike dhe shoqërore dhe  shpresohet  se zgjedhjet do të rikthejnë stabilitetin.

Lexoni gjithashtu:

Zgjedhjet në Rumani, pjesëmarrja pritet të jetë e ulët për shkak të pandemisë