Zgjidhja e konfliktit me Izraelin, Rusia kërkon të takojë kreun e Hamas

Rusia bën me dije se zëvendësministri i saj i Jashtëm shpreson të takohet me përfaqësuesit e Hamasit në shtetin e Gjirit të Katarit javën e ardhshme për të diskutuar lirimin e pengjeve izraelitë. Lajmi është bërë me dije nga agjencia shtetërore ruse e lajmeve Ria-Novosti.

Moska sipas shumë analistëve  e ka përcaktuar veten si një paqebërës potencial. Sipas tyre Moska ka lidhje me Hamasin dhe Iranin – i cili besohet të jetë i përfshirë në financimin e militantëve.

Mikhail Bogdanov tha për Ria-Novosti se ai “nuk e përjashtoi” takimin me përfaqësuesit e Hamasit gjatë udhëtimit të tij, duke shtuar: “Nëse ata janë të gatshëm, ne jemi gjithmonë në favor të kontaktit.

Sidomos në këtë situatë [takimi] do të ishte i dobishëm për zgjidhjen e çështjeve praktike, duke përfshirë lirimin e pengjeve, shtoi zëvendësministri rus.

Përgjigja e Rusisë ndaj dhunës së kësaj jave në Izrael dhe Gaza ka qenë e heshtur teksa peshon aleancat dhe interesat e saj konkurruese në rajon.

Moska nuk e dënoi hapur dhunën e ushtruar ndaj Izraelit fundjavën e kaluar nga grupi militant Hamas, i cili mbështetet nga aleati i tij Irani, por ishte e kujdesshme edhe me partnerët  izraelitë. Ministria e saj e Jashtme u bëri thirrje të gjitha palëve të heqin dorë nga dhuna, të ushtrojnë përmbajtje dhe të zbatojnë një armëpushim, duke paralajmëruar për një përshkallëzim potencialisht shumë të rrezikshëm.

Rusia do të përfitojë nga trazirat në një sërë mënyrash, thonë analistët, duke pasur parasysh shpërqendrimin nga lufta e saj në Ukrainë, statusin e eksportit të naftës dhe potencialin për të ndërmjetësuar mes palëve të ndryshme në rajon.