Zjarret në Evropë, katër të vdekur dhe qindra mijëra hektarë të djegura

Evropa Jugore po përballet me një situatë alarmante për shkak të temperaturave ekstreme dhe përhapjes së zjarreve në disa vende. Temperaturat që kalojnë 40°C kanë krijuar kushte të favorshme për shpërthimin e flakëve në rajone të ndryshme të Spanjës, Portugalisë, Greqisë dhe Turqisë.

Në Spanjë, autoritetet raportojnë 14 vatra aktive zjarresh, me pasoja tragjike tre të vdekur, përfshirë dy zjarrfikës vullnetarë. Kryeministri Pedro Sanchez paralajmëroi për një rrezik të lartë të përhapjes së mëtejshme të flakëve. Deri tani, mbi 158,000 hektarë tokë janë djegur, një zonë që i afrohet përmasave të Londrës metropolitane.

Portugalia gjithashtu po përjeton një nga sezonet më të vështira të zjarreve. Viktima e parë është një ish-kryetar bashkie, ndërsa 4,000 zjarrfikës po përpiqen të frenojnë përhapjen e shtatë zjarreve madhore. Shteti ka kërkuar ndihmë nga Bashkimi Evropian për të përballuar situatën emergjente.

Në ishullin Kios të Greqisë, një zjarr ka vazhduar për katër ditë me radhë dhe ka detyruar autoritetet të evakuojnë disa zona. Ndërkohë, edhe Turqia po lufton me disa vatra zjarri, edhe pse pjesa më e madhe e tyre është nën kontroll.

Sipas ekspertëve të klimës, ngrohja globale e nxitur nga përdorimi i karburanteve fosile po çon në shtim të rasteve të zjarreve dhe intensitetit të tyre. Që nga vitet 1980, Evropa ka përjetuar një ritëm ngrohjeje dyfish më të shpejtë krahasuar me pjesën tjetër të globit. Agjencia klimatike e BE-së e ka shpallur vitin 2024 si më të nxehtin në histori.

LEXONI GJITHASHTU: 

• Zjarret shkatërruese në Delvinë, bashkia nis punën për evidentimin e dëmeve
• Situata nga zjarret në Shqipëri drejt stabilizimit, sa vatra mbeten aktive