Zjarri në kompleksin pranë farmacisë 10, shpallet në kërkim Armand Lilo

Lidhur me ngjarjen e djeshme të përfshirjes nga flakët të një pallati në kompleksin pranë “Farmacisë 10”, në zonën e “5 Majit” përballë QSUT-së, policia ka shpallur në kërkim administratorin e objektit, Armand Lilo. Gjithashtu, është arrestuar menaxherja e marketit që ndodhej në katin e parë të pallatit.

Një zjarr i fuqishëm përfshiu godinën pranë Spitalit Universitar “Nënë Tereza” në Tiranë, duke vënë në lëvizje të gjitha strukturat emergjente. Në operacionin për shuarjen e flakëve u angazhuan edhe forcat e ushtrisë, të cilat mbështetën zjarrfikësit në përpjekjet për vënien nën kontroll të situatës.

Si pasojë e tymit të dendur, katër persona dy qytetarë dhe dy efektivë zjarrfikës – u paraqitën në urgjencën e QSUT-së me shenja asfiksie dhe morën ndihmën e nevojshme mjekësore.

Zjarri ka përfshirë fasadën e pallatit dhe për disa minuta ka qenë aktiv, ndërsa e gjithë zona u mbulua nga një re e dendur tymi, duke shkaktuar panik te banorët dhe kalimtarët. Autoritetet vijojnë hetimet për zbardhjen e plotë të shkaqeve të ngjarjes.