Zjarri pushton Portugalinë, flakët djegin 5 mijë hektarë tokë në ishullin Madeira

Një zjarr i madh ka përfshirë bregun jugor të ishullit të Madeira të Portugalisë duke djegur më shumë se 5,000 hektarë tokë.

Zjarri që ka filluar prej datës 14 gusht, mbetet i pakontrolluar dhe po shkakton shqetësim të madh në zonat bregdetare jugore të Camara de Lobos dhe Ponta do Sol, si dhe në rajonin malor Pico Ruivo.

Më shumë se 400 zjarrfikës, 120 policë pyjorë, 200 personel të mbrojtjes civile, 40 automjete dhe një avion po luftojnë aktualisht me flakët, raportojnë mediat portugeze.

Autoriteti Kombëtar Portugez për Emergjencat dhe Mbrojtjen Civile është përballur me kritika të forta nga sindikatat dhe partitë opozitare për trajtimin e situatës.

“Nuk ka asnjë kërcënim për popullsinë, shtëpitë apo infrastrukturën. Ndërhyrja deri më tani ka qenë e përshtatshme”- është shprehur presidenti i qeverisë rajonale të Madeira.

Shumica e vizitorëve në ishullin e njohur turistik janë evakuuar për shkak të zjarrit.

LEXONI GJITHASHTU:

• Gjirokastër| Zjarri përfshin kullotat në dy fshatra, ndërhyjnë zjarrfikësit
• Zjarret në Gjirokastër, reshjet e shiut ndihmojnë në lehtesimin e situatës