“1 Maji”| Po marshonin drejt sheshit Taksim, Policia turke shpërndan protestuesit

Ditën e sotme pranë sheshit Taksim në Stamboll shumë qytetarë protestuan në Ditën Ndërkombëtare të Punëtorëve, ‘1 Majin’.

Sipas mediave të huaja, Policia turke përdori forcën për të shpërndarë protestuesit që përpiqeshin të marshonin drejt sheshit Taksim, pasi qeveria ndaloi protestat e 1 majit në sheshin kryesor të Stambollit.

Njerëz nga parti të ndryshme të majta u mblodhën pranë Saraçanit, më shumë se tre kilometra larg sheshit Taksim. Policia kishte bllokuar të gjitha rrugët që të çojnë në shesh, pasi presidenti Erdogan tha se nuk do të lejoheshin demonstrata atje.

Ministri i Punëve të Brendshme, Ali Yerlikaya, njoftoi se u arrestuan 210 persona që shpërfillën paralajmërimet e u përpoqën të avanconin në sheshin Taksim dhe sulmuan ekipet e policisë.

“210 persona që shpërfillën paralajmërimet dhe u përpoqën të avanconin në sheshin Taksim dhe sulmuan policët tanë më 1 maj, Ditën e Punës dhe Solidaritetit në Stamboll u arrestuan”, tha ministri Yerlikaya.

Një sërë masash paraprake u morën në Stamboll për shkak të 1 Majit dhe disa rrugë u mbyllën për qarkullimin e mjeteve.

Është bërë e ditur se nga ora 16:00 janë hequr kufizimet në disa pika që ishin të mbyllura për transportin në kuadër të masave të sigurisë.

Po ashtu, u tha se rruga Refik Saydam e rrethit Beyoğlu, rruga Tersane, rruga Kurtuluş Deresi, rruga Sıracevizler, rruga Darülaceze, rrugët që të çojnë nga rruga Bahariye në bulevardin Tarlabaşı dhe Ura e Galatas do të vazhdojnë të jenë të mbyllura në të dy drejtimet.

LEXONI GJITHASHTU:

• Nikolla mesazh për 1 Majin: Po punojmë për ligje më të mira për botën e punës
• Mbi 100 policë të lënduar nga demonstratat e 1 Majit në Francë