100 mijë palestinezë në Shqipëri? Përplasen Koka dhe Klosi

Në një postim të bërë në rrjetin social X nga një gazetar izraelit, u tha se Shqipëria mund të presë 100 mijë banorë nga Gaza, por nga ana tjetër kryeministri Rama ka reaguar menjëherë duke e hedhur poshtë diçka të tillë si një lajm të rremë.

Lidhur me këtë çështje kanë diskutuar në emisionin “Now” Sekretari i Përgjishëm i PS, Blendi Klosi dhe gazetari Bledian Koka të ftuar në Euronews Albania.

Nga njëra anë, Koka tha se çdo lajm të tillë ne nuk e marrim vesh nga qeveria por nga mediat ndërkombëtare. Ai shtroi si shqetësim transparencën e këtyre zhvillimeve, duke vënë në dukje se sipas tij, qeveria po përdor Shqipërinë për interesat e veta personale.

“Edhe sikur pritje të tilla si ajo e afganëve apo afrikanëve apo më shumë gjasë dhe kjo e palestinezëve të jetë një gjë e mirë, problemi në raport me qeverinë e Klosit është mungesa e transparencës dhe diskutimit me qytetarët. Nuk është problemi a janë apo jo shqiptarët mikpritës. E vërteta e madhe është se si qeveria e përdor tokën e shqiptarëve për axhendën e tij personale. Shqetësues është fati i Shqipërisë dhe kritika kryesore e qeverisë është kur këto gjëra përdoren si një interes personal politik”, tha gazetari Koka.

Nga ana tjetër, Klosi ka replikuar duke pohuar se pranimi i refugjatëve dhe pritjeve të tilla është diçka politike shtetërore duke dhënë dhe arsyen pse ndodh kjo.

“Pritje të tilla kanë ndodhur për të vendosur raporte me aleatët dhe për të dëshmuar Shqipërinë si një vend të sigurtë. Kemi pasur vetëm gjëra pozitive. Shqipëria dëshmoi që është një vend mikpritës. Sa i përket raportit më afganët ishte pjesë e gjithë lajmeve botërore për mikpritjen, pjesë e dëshmisë së një vendi solid”, tha Sekretari i Përgjishëm i PS.

Lidhur me këtë, Koka është kundërpërgjigjur duke theksuar se interesa gjeopolitike kanë dhe Maqedonia e Veriut, Mali i Zi dhe Kosova. Ai i drejtohet Klosit duke nënkuptuar se edhe vende të tilla janë mikpritëse por vetëm Shqipëria i vjen në ndihmë çdo vendi të botës.

LEXONI GJITHASHTU:

• Shqipëria do të marrë 100 mijë banorë nga Gaza? Reagon Rama
• Bledian Koka: Emigrantët rrezik për sigurinë kombëtare