100 mln euro për bujqësinë, Basha në Malësinë e madhe: Mbështesim fermerët, Rama i braktisi

Fushata e Partisë Demokratike u ndal të hënën në Malësinë e Madhe. Kryetari, Lulzim Basha zhvilloi edhe një takim me përfaqësues të shoqatës së bimëve medicinale, ku akuzoi të majtët për braktisjen e fermerëve dhe premtoi subvencione 100 milione euro për sektorin.

“Duke eliminuar çdo burokraci, dhe kur them çdo burokraci kam parasysh ato halle të pazgjidhura që fillojnë që nga certifikatat e pronësisë, tokat e deri tek NIPT-et ku për fermerin shqiptar numri personal i identifikimit do të përbëjë në të njëjtën kohë edhe NIPT-in e tij. Duke vazhduar me shpikjet që na kanë bërë muajt e fundit me diferencimin 20, 6% e cila bie e gjitha në kurrizin e fermerëve shqiptarë dhe industrisë agropërpunuese. 100 milionë euro në vit do të mundësojnë që fermeri shqiptar ta gëzojë frytin e djersës së vet. E të gëzojë për mua nuk do të thotë të mbajë veten dhe fëmijët me bukë por të kthehet në pjesë të shtresës së mesme shqiptare,” – tha Basha.