12 miliardë $ kundër urisë, OKB kërkon zhbllokim të eksporteve ukrainase

Me një paketë prej 12 miliardë dollarësh nga Banka Botërore dhe një thirrje e OKB-së për të zhbllokuar eksportet ukrainase të drithërave, komuniteti ndërkombëtar po përpiqet të avancojë përpjekjet për të shmangur krizën e ushqimit në botë, që është përkeqësuar që kur Rusia pushtoi Ukrainën.

“Nuk ka zgjidhje efikase të krizës ushqimore pa riintegruar produktet ukrainase, si dhe ushqimet dhe fertilizuesit e prodhuar nga Rusia dhe Bjellorusia në tregjet botërore. Rusia duhet të lejojë eksportin e sigurt të drithërave të bllokuara në portet ukrainase dhe produktet ruse duhet të kenë akses të pakufizuar në tregjet botërore pa asnjë pengesë”, tha Antonio Guterres, sekretar i përgjithshëm i OKB-së.

Nga ana e tyre, institucionet financiare ndërkombëtare i dhanë jetë një plani veprimi me projekte konkrete për të përshpejtuar programet ekzistuese, me qëllim përmbushjen e nevojave aktuale.

“Kjo është një krizë që ka gjasa të përkeqësohet krahasuar me krizën ushqimore të viteve 2007-2008, duke prekur familjet e varfra. Tashmë ne kemi konstatuar pasiguri ushqimore në nivele të larta. Për t’ia dalë, fondi do të përdoret për familjet e varfra duke përforcuar sigurinë sociale”, u shpreh Martien Van Nieuwkoop, drejtor për agrikulturën dhe ushqimin në Bankën Botërore.

Në Nju Jork, sekretari amerikan i Shtetit, Antony Blinken, që personalisht kryesoi takimin ministerial për krizën ushqimore, nënvizoi angazhimin e Shteteve të Bashkuara për të luftuar kundër urisë dhe kequshqyerjes në botë.

LEXONI GJITHASHTU:

• Pushtimi i Ukrainës mund të shkaktojë krizë globale ushqimore, paralajmëron OKB
• Xhaçka: Shqipëria mbështet thirrjen e OKB-së për sigurinë ushqimore