17 vjetori i vdekjes së Rugovës. Osmani: Do t’i ruajmë aleancat tona njësoj si ai

Presidentja e vendit, Vjosa Osmani, ka nderuar jetën dhe veprën e ish-presidentit, Ibrahim Rugova, në 17 vjetorin e vdekjes së tij.

Osmani thotë se Rugova iu dha zë të gjitha kërkesave të drejta të popullit të Kosovës për liri dhe pavarësi.

Më tej ajo theksoi se Rugova ndërtoi miq e aleatë që e mbështetën Kosovën në ditët më të errëta ashtu do të vazhdojnë t’i ruajnë këto aleanca në rrugën përpara të vendit.

“Sot në këtë përvjetor të shkuarjes në amshim të atit themeltar të Republikës së Kosovës, presidentit historik, Ibrahim Rugova, e përkujtojmë me mall njeriun i cili i dha zë kërkesave të drejta të popullit të Kosovës për liri dhe pavarësi. Natyrisht se është trashëgimia që ai la pas që na shërben si dritë udhërrëfyese në përpjekjet tona të pandaluara për shtetin tonë dhe shtetin që u ndërtua me aq shumë mund e sakrificë të shumë burrave e grave të Kosovës. Ashtu siç diti presidenti Rugova të ndërtojë miq e aleatë që e mbështetën Kosovën në ditët më të errëta e të rënda ashtu do i ruajmë këto aleanca në rrugën tonë përpara përderisa Kosova vazhdon të përballet me sfida. I përjetshëm është kujtimi për të, trashëgimia e tij do të rrojë përherë edhe në brezat e ardhshëm”, tha Osmani.

LEXONI GJITHASHTU: 

• Vidhte makina dhe i shiste me kontrata false, arrestohet 38-vjeçari në Tiranë
• 12 vite nga 21 janari, Spiropali: Krim shtetëror, SPAK të hapë hetimin