Ditën e shtunë trajneri Sylvinho publikon listën e lojtarëve të thirrur për dy përballjet e muajt qershor ndaj Moldavisë dhe Ishujve Faroe. Një emër i cili duhet testuar patjetër është dhe ai i mesfushorit Enriko Papa, i cili së fundmi fitoi kupën me skuadrën e Sepsi Sf Georghe në Rumani.

I kontaktuar nga Euronews Albania, Papa ka pohuar se është gati për të qenë pjesë e kombëtares shqiptare, ndërsa është në pritje të një ftese nga Sylvinho.

“ Jam në formë shumë të mirë, e ndjej veten gati për kombëtaren shqiptare dhe jam i gatshëm për të dhënë kontributin tim. Sapo fitova kupën me skuadrën time Sepsi në Rumani, ndërsa Rizespor kërkon që të rikthehem në kampionatin turk në sezonin e ri”,-tha mesfushori Enriko Papa.

Papa është një lojtar që ka shkëlqyer në kampionatin rumun edhe në kohën kur luante me Botostanin, duke u kthyer në një nga lojtarët kyç, teksa mbante shiritin e kapitenit. Më pas u transferua tek Rizespor. Përgjatë tërmetit të Turqisë u huazua tek Sepsi, por duket se mesfushori shqiptar është i ‘apasionuar’ pas trofeve.

Në një pikë ku kombëtarja shqiptare ka nevojë për lojtarë inteligjentë, Papa është një nga ata të cilët i duhet Sylvinhos në ndeshjet e qershorit, për t’i shërbyer repartit ofensiv.

LEXONI GJITHASHTU:

• Autobusi i shkollës përplaset me kamionin, 10 të plagosur në Karolinën e Jugut
• GJKKO pushon padinë e Lulzim Bashës ndaj Erion Veliajt