2 vjet nga pushtimi rus, ukrainasit mes frikës dhe optimizmit për fundin e luftës

Për ukrainasit po bëhen 2 vjet nga pushtimi i vendit të tyre nga Rusia. Sipas burimeve të OKB-së, viktimat në radhët e civilëve janë rreth 30 mijë, edhe pse ka gjasa që bilanci të jetë më i lartë.

Shkalla e vdekjeve në radhët e ushtrisë nuk dihet dhe mbahet sekret, por vlerësimet flasin nga 25 deri në 70 mijë. Çdo ditë, dikush ka diçka për të treguar.

“Një shoku im vdiq dje si pasojë e luftës. Erdha këtu për të blerë një flamur dhe për të qëndruar. Duam t’i japim fund luftës, duam liri. Miku im ishte vetëm 27 vjeç dhe u qëllua nga një snajper”, tha Ilya, banor i Kievit.

Ushtria ukrainase vlerësohet për suksesin e saj në dëbimin e trupave ruse nga gjysma e territorit të vendit. Por sipas ekspertëve, aktualisht lufta ka hyrë në ngërç. Presidenti Zelensky shkarkoi kryegjeneralin e tij në një moment kyç.

“Po, ashtu është. Është një situatë e vështirë në Avdivka të rajonit të Zaporizhës dhe praktikisht në të gjithë vijën e frontit. Ndonjëherë duhet të shohësh faktet dhe të besosh se ne do të forcojmë pozitat tona dhe do të besojmë në fitoren e Ukrainës”, tha Andriy Yarmek, shef i shtabit të Ukrainës.

Dhuna brutale e forcave ruse u bë e njohur fillimisht në lokalitete si Buça dhe Borodjanka, ku civilët u vranë në gjakftohtësi, në kuadër të avancimit të pushtuesve drejt Kievit. Tani, BE po e ndihmon Ukrainën në rindërtimin e saj.

“E keqja është se ka sulme të vazhdueshme me dronë, se qytetet janë nën presion, sidomos sa i takon sistemeve të ngrohjes, ujësjellësve dhe infrastrukturës që Rusia po sulmon qëllimisht”, tha Virginijus Sinkevičius, komisioner i BE për Ambientin.

Edhe pse ukrainasit mundën të zmbrapsnin ushtrinë ruse brenda një muaji nga marrja brutale e Borodjankës, ajo la pas shkatërrim dhe trauma. Megjithatë, Ukraina thotë se është prioriteti i saj t’i kthejë njerëzit e larguar, të rindërtojë godinat e banuara dhe të rikthejë jetën normale….

LEXONI GJITHASHTU:

• Më 28 shkurt mbahet në Tiranë samiti për Ukrainën, i pranishëm dhe Zelenskyy
• Lufta në Ukrainë, Franca akuzon Rusinë për fushatë manipulimi kundër Perëndimit