Më 28 shkurt mbahet në Tiranë samiti për Ukrainën, i pranishëm dhe Zelensky

Presidenti ukrainas, Volodymyr Zelenksy dhe liderët e Ballkanit Perëndimor do të jenë në Tiranë në fund të muajit shkurt. Ata pritet të marrin pjesë në Samitin e Paqes, i cili do të zhvillohet për dy ditë me radhë në datat, 28 dhe 29 shkurt.

Dita a parë do t’i dedikohet Ukrainës me presidentin Zelensky, i cili më herët i është drejtuar parlamentit shqiptar me videokamera, ndërsa këtë herë do të vijë në vizitën e parë në Shqipëri.

Një ditë më pas, më 29 shkurt, kryeqyteti do të presë liderët e Ballkanit Perëndimor, ku fokusi do të jetë integrimi i Ballkanit Perëndimor drejt Bashkimit Evropian, si edhe zbatimi i Planit të Rritjes Ekonomike.

Fokusi i këtij samiti do të jetë lufta prej dy vitesh që po zhvillohet nga forcat ruse, ndërsa Ukraina ndodhet në luftë që prej 24 shkurtit të vitit 2022.

Disa ditë më parë, nga Shkupi kryeministri Edi Rama e lajmëroi samitin në Tiranë dhe vizitën e Zelenskyt.

Gjatë mandatit dy-vjeçar në Këshillin e Sigurimit të Kombeve të Bashkuara, Shqipëria luajti një rol aktiv në paqen dhe sigurinë ndërkombëtare, si një prej vendeve që ka mbështetur Ukrainën.

Shqipëria ishte krah Shteteve të bashkuara të Amerikës si bashkëpenëmbajtëse e çështjes së Ukrainës në Këshillin e Sigurimit të Kombeve të Bashkuara.

LEXONI GJITHASHTU: 

• Huthët sulmojnë një anije që ishte nisur drejt Iranit
• Me pistoletë dhe municione në lokal, arrestohet 30-vjeçari në Tiranë