27 minatorë dyshohet se kanë vdekur nga zjarri në një minierë ari në Peru 

Dyshohet se 27 minatorë kanë humbur jetën nga zjarri në një minierë ari në jug të Perusë, raporton Reuters.

Qeveria lokale në rajonin e Arequipa, ku ndodhet miniera, tha të shtunën se numri i të vdekurve nuk ishte konfirmuar “sepse nuk kishte asnjë mënyrë për të komunikuar me telefon nga miniera”.

Qeveria deklaroi se shkaku i mundshëm i zjarrit në minierë ishte një qark i shkurtër, ndërsa mediat lokale dhe rrjetet sociale publikuan video të zjarrit ku shiheshin re të errëta tymi.

Peruja është prodhuesi më i madh i arit në Amerikën e Jugut dhe miniera është një industri kryesore në atë vend. Dhjetëra aksidente ndodhin në Peru çdo vit, kryesisht në miniera të vogla.