322 ndeshje në karrierë, Sokol Kushta shpallet “Qytetar Nderi i Vlorës”

Të gjithë e mbajnë mend për golin spektakolar ndaj Partizanit të Beogradit, madje dhe kontributin e jashtëzakonshëm për skuadrën e Flamurtarit dhe kombëtares shqiptare, ish-futbollisti Sokol Kusha, një shembull frymëzimi për brezat e rinj është vlerësuar me titullin ‘Qytetar Nderi i Vlorës’.

Për shkak të pandemisë, ceremonia është zhvilluar këtë fundjavë në qytetin bregdetar, në një sallë ku të pranishëm ishin familjarë, ish-sportistë, deputetë dhe personazhe të tjerë të njohur në vend.

“Falënderoj gjithë njerëzit nga shpirti, që erdhën sot, që u bënë pjesë. Njerëzit asnjëherë nuk janë të përkryer. Kjo është nismë e vazhdim i kësaj pune që ne të bëhemi të përkryer”, tha ish-futbollisti.

Bashkëpunëtorë të Sokol Kushtës, ikona të sportit në Vlorë dhe më gjerë kanë vlerësuar kontributin e futbollistit të shquar vlonjat që mbahet mend nga të gjithë për eliminimin e Partizanit të Beogradit nga garat e Kupës UEFA dhe çoi peshë zemrat e gjithë shqiptarëve

“E njeh jo vetëm çdo shqiptar e vlonjat, por dhe Ballkani. Akoma sot në stadiumet e Beogradit tifozët kundërshtarë thërrasin e emrin e Kushtës për t’i bërë presion”, tha kreu i FSHF, Armand Duka.

Gjatë karrierës së tij, Sokol Kushta regjistron 322 paraqitje, ndërkohë është i vetmi lojtar shqiptar i nominuar për çmimin prestigjioz Topi i Artë. Po ashtu, është një ndër 10 shënuesit më të mirë të kombëtares shqiptare.

LEXONI GJITHASHTU:

• KATAR 2022, Maroku nxjerr “jashtë loje” Portugalinë
• Ndërron jetë gazetari amerikan gjatë ndeshjes Holandë-Argjentinë në Katar