35 kilometra gardh shtesë në kufirin e Greqisë me Turqinë, 5 metra i lartë

Në prani të kryeministrit grek, Kyriakos Mitsotakis, u nënshkrua kontrata për ndërtimin e 35 kilometrave gardh shtesë përgjatë kufirit të Greqisë me Turqinë.

Gjatë nënshkrimit të kontratës të premten, Mitsotakis përsëriti se plani është shtrirja e barrierës kufitare në 140 kilometra. Kryeministri grek tha se do të vazhdojë të kërkojë financim për ndërtimin e barrierës nga fondet evropiane në të gjitha nivelet, njofton “Greek Reporter”.

99.2 milionë euro do t’i kushtojë shtetit grek ndërtimi i një gardhi metalik, pesë metra i lartë. Kontrata u nënshkrua nga ministri grek i Mbrojtjes së Qytetarëve, Takis Theodorikakos dhe përfaqësues të kompanive të ndërtimit, TERNA dhe Intrakat Group.

Gjatësia aktuale e gardhit kufitar midis Greqisë dhe Turqisë, për të cilën qeveria greke vlerëson se ka parandaluar hyrjen e paligjshme të rreth 250 mijë emigrantëve në vitin 2022, është 37.5 kilometra.

LEXONI GJITHASHTU:

• Lëkundje tërmeti në Greqi, ja sa ishte magnituda
• NATO zgjerohet me Finlandën, Turqia ratifikon anëtarësimin