36 mandatet e Tiranës, si ndryshoi vota për partitë krahasuar me 2017

Partia Socialiste mori 18 mandate deputetësh në qarkun e Tiranës, ajo demokratike me aleatët 15, 2 LSI dhe 1 PSD e Tom Doshit. Kjo e fundit kishte rritjen më të dukshme në krahasim me zgjedhjet e 4 viteve më parë. Nga 820 vota në 2017, shënoi një rezultat prej 13 mijë e 273 votash.

Rritje në qarkun e Tiranës, me mbi 54 mijë vota plus kishte PD, por të pamjaftueshme për të kaluar në mandate PS-në.

Partia e Edi Ramës shënoi gjithashtu një rritje me 26 mijë vota. Ndërsa LSI e Kryemadhit në qarkun më të madh të vendit, humbi rreth 28 mijë të tilla në krahasim me 2017-n.

Në bashkinë Kamëz, LSI ruajti pak a shumë të njëjtin rezultat, por PD humbi rreth 10 mijë vota dhe PS shtoi rreth 9000. Rezultat pa shumë diferenca, 2 partitë e mëdha patën në Kavajë e Rrogozhinë, ku LSI mori përkatësisht vetëm 1/3 dhe 1/2 e votave të 2017.

Në Vorë po ashtu humbja ishte thellë për LSI, ku nga 4500 vota të 4 viteve më parë, në 25 prill mori vetëm 900. Në bashkinë Tiranë, 2 partitë e mëdha kishin rritje në vota, me përjashtim sërish të LSI që i përgjysmoi ato.

Në çdo njësi bashkiake, me përjashtim të asaj 3, 4, 8 dhe 10, PS kishte rritje me minimalisht 1000 vota.

Rritje të konsiderueshme kishin demokratët në të gjitha njësitë bashkiake dhe përgjysmim të votave të marra 4 vite më parë kishte LSI.