Gjirokastra është një nga destinacionet e preferuara të turisteve të huaj këtë verë. Kalanë e këtij qytetit vetëm gjatë muajit korrik e kanë vizituar 36 mijë turistë.
Rreth 36 mijë turistë pjesa më e madhe të huaj vizituan gjatë muajit korrik kalanë e Gjirokastrës. Prej fillimit të vitit kështjella e Argjiros ka mirëpritur rreth 125 mijë turistë duke qenë monumenti i kulturës më i vizituar në vendin tonë. Turistët mbërrijnë në mënyrë individuale, familjarisht ose me grupe ndërsa vlerësojnë historinë dhe arkitekturën e kësaj kalaje.
“Jemi një familje vijmë nga Berlini, për ne është vizita e parë në Shqipëri, është një vend i bukur me njerëz të këndshëm dhe mikpritës, këtu në Gjirokastër po vizitojmë kështjellën që na duket interesante, është tërheqëse të mësosh për historinë e Shqipërisë”, thotë një turiste.
“Jemi një grup nga Spanja, prej një jave jemi duke vizituar Shqipërinë, sot u ndalëm në Gjirokastër dhe tek kjo kështjellë për të cilën mendojmë se është shumë e bukur dhe kemi parë gjëra mjaft interesante”, shprehet një tjetër.
Kalaja e Gjirokastrës me vlerat e saj historike dhe ndërtimore është kthyer në simbol të qytetit të gurtë duke qenë një pikë mjaft e preferuar dhe për turistët.
LEXONI GJITHASHTU:
- Zjarr i madh në Gjirokastër, 60 forca zjarrfikës dhe vullnetarë në terren
- UNESCO miraton vendimet për Butrintin, Gjirokastrën e Beratin
