360 mln euro kredi me probleme, ndikon inflacioni dhe normat e interesit

Kreditë me probleme janë ulur lehtë në muajin tetor. Sipas statistikave të Bankës së Shqipërisë, ato përbënin 5.12%, nga 5.24% që kishin qenë në fund të muajit shtator.

Raporti i kredive me probleme është gjithashtu në rritje 0.12% krahasuar me të njëjtën periudhë të një viti më parë, kur shënonte nivelin 5%.

Rritja e raportit të kredive të këqija gjatë këtij viti ishte e pritshme, por deri tani kjo rritje ka qenë në përmasa të vogla dhe poshtë pritshmërive të Bankës së Shqipërisë.

Inflacioni i lartë dhe rritja e normave të interesit vitin e kaluar, gjykohet se ndikuan në përkeqësimin e treguesve gjatë këtij viti.

Ndërkohë, sa i përket kursit të këmbimit, forcimi i Lekut ka dhënë pjesërisht edhe një efekt paralel negativ, sepse ka tkurrur vlerën e portofolit të kredisë në valutë. Vlera e portofolit të kredisë për ekonominë në fund të tetorit arriti në 7.2 mld euro, me një rritje vjetore prej 1.9%. Në mungesë të efektit të kursit të këmbimit, Banka e Shqipërisë llogarit se rritja vjetore do të kishte qenë rreth 7%.

Në total sistemi bankar shqiptar ka më shumë se 360 milionë euro kredi, e cila nuk paguhet në kohë.

LEXONI GJITHASHTU:

• Shtohen familjet në Kosovë që marrin kredi për ushqime
• Ulet norma e interesit për kredi në lekë, rënia më e madhe prej më shumë se një viti