4 ditë punë në javë, kompanitë britanike zgjedhin opsionin e orëve të shkurtuara

Në Britaninë e Madhe u publikuan ditën e martë rezultatet e një eksperimenti që testonte punën me 4 ditë në javë.

Sipas mediave lokale, nga eksperimenti rezultoi se shumica e kompanive që morën pjesë në të nuk dëshirojnë t’i kthehen sërish punës standarde prej 5 ditësh; ndërsa një e treta e tyre janë të gatshme ta bëjnë këtë ndryshim të përhershëm.

Në studimin e kryer nga qershori deri në dhjetor të vitit të kaluar morën pjesë 61 organizata dhe rreth 2 mijë e 900 punonjës.

Gjatë testimit, vetëm 3 organizata vendosën të ndërprisnin pjesëmarrjen dhe vetëm dy prej tyre vazhdojnë ta shqyrtojnë mundësinë e shkurtimit të orëve të punës.

Vlen të theksohet se eksperimenti ndodhi në rrethana të vështira ekonomike për shumë kompani britanike, të dëmtuara nga inflacioni i lartë, paqëndrueshmëria politike dhe pasojat e Brexit.

Mbajtja e një prove për reduktimin e orëve të punës në kulmin e rënies ekonomike dukej diçka e diskutueshme.

Por të dhënat e eksperimentit britanik përputhen me ato të testeve të kryera me kompanitë në Shtetet e Bashkuara, Irlandë dhe Australi.

Testet në fjalë, të kryera në përmasa më të vogla, treguan rritje të të ardhurave për kompanitë, produktivitet më efikas të punonjësve dhe një rënie të mungesave në punë.

LEXONI GJITHASHTU:

• Britania nis javën me 4 ditë punë, pa ndryshim page
• Belgjika bëhet vendi më i fundit që lejon javën me 4 ditë punë