5 të arrestuar në Bullgari lidhur me sulmin me bombë në Stamboll

Policia bullgare ka arrestuar pesë persona në lidhje me sulmin me bombë në Stamboll fundjavën e kaluar që vrau gjashtë persona, njoftoi sot prokuroria bullgare.

Të dyshuarit janë arrestuar për ndihmën e një prej pjesëmarrësve në shpërthimin e 13 nëntorit, tha zëdhënësja e kryeprokurorit bullgar Sika Mileva, pa specifikuar kombësinë e tyre.

Ata akuzohen për ofrimin e ndihmës logjistike në arratisjen e të dyshuarit të dytë kryesor në sulmin në Stamboll, tha Mileva, pa specifikuar nëse i dyshuari ishte ende i lirë, raportoi AP.

Agjencia Anadolu raportoi sot se policia anti-terroriste në Stamboll arrestoi tetë persona të tjerë të dyshuar se ndihmuan ata që kryen shpërthimin.

Një gjykatë turke të premten urdhëroi ndalimin e 17 të dyshuarve në pritje të gjykimit, duke i akuzuar ata për përpjekje kundër unitetit kombëtar, vrasje me paramendim dhe tentativë vrasje. Gjykata liroi tre të dyshuar të tjerë nga paraburgimi deri në fillimin e gjykimit, raportoi AP.

LEXONI GJITHASHTU:

• Sulm me bombë në Stamboll, urdhërohet paraburgimi për 17 të dyshuar
• Mbi 20 të arrestuar, Policia: Atentati në Stamboll, përgjegjësi e terroristëve kurdë