5 turistë ngecën 12 orë në Bogë, flasin djemtë që i shpëtuan në mes të borës

Erkin Lika dhe Ornold Baze, të dy anëtarë  të ekipit të kërkim-shpëtimit malor të Shqipërisë kanë rrëfyer në emisionin “Good Morning Albanians” në Euronews momentet kur 5 turistë kishin ngecur mes dëborës në Bogë, të cilëve u dha ndihmë prej tyre.

Në rrëfimin e tij Lika tha se njëri prej turistëve kishte rrëshkitur dhe kishte dëmtuar këmbën, çka sipas tij e bënte më urgjente evakuimin e tyre.

Ndërsa Baze tha se destinacioni i turistëve që ngecën për 12 orë në Bogë ishte maja e Çardakut, të cilën ata sipas tij e kishin arritur me sukses dhe incidenti ndodhi në kthim.

“Kishte ngrica në Bogë, terren i vështirë. Ishte edhe një njeri që kishte një dëmtim në këmbë dhe kërkonin sa më shpejt ta ulnim poshtë sepse po i shteronin edhe forcat. Rrëth orës 15:00 disa anëtarë tanët ishin duke bërë një hiking.

Një anëtar i grupit ka rrëshkitur, si pasojë ka ngelur i dëmtuar në këmbë. Anëtarët tanë kanë bërë çmos ta ulin në një zonë të sigurt. Është transportuar afër një guve, i është dhënë ndihmë. Ishin 5 persona, njëri u dëmtua dhe u bë edhe shoqërimi i tyre”, tha Lika.

“Janë organizime të ndryshme që ndodhin çdo fundjavë. Destinacioni ishte maja e Çardakut, që është edhe maja më e vështirë e Bogës për t’u arritur. Maja është arritur me sukses nga grupi, por në momentin e kthimit ka ndodhur incidenti. Duke qenë të paktë në numër e kishin të pamundur pjesën e evakuimit”, tha Baze.

LEXONI GJITHASHTU:

• I gjithë qarku Korçë përfshihet nga bora, 10 borëpastruese në terren
• Temperatura deri në -5 gradë, rikthehen ngricat dhe bora në gjithë Shqipërinë