50 shtete në alarm, frikë nga protestat pro-Trump, rriten masat e sigurisë në SHBA

Autoritetet në të 50 shtetet amerikane janë në alarm për protesta të dhunshme që mund të ndodhin këtë fundjavë, pak ditë nga inaugurimi i presidentit të zgjedhur Joe Biden.

Trupat e Gardës Kombëtare janë shtuar në Uashington DC, për të penguar çdo përsëritje të ngjarjeve të 6 janarit.

Ka qenë FBI që ka paralajmëruar mbajtjen e protestave të armatosura nga mbështetësit e Trump, që besojnë ende deklaratat false të tij për manipulim të zgjedhjeve.

Miçigan, Virxhinia, Uiskonsin, Pensilvania dhe Uashingtoni janë shtetet ku masat e sigurisë janë përforcuar më shumë, ndërsa në Teksas zyrat e Kongresit vendor u mbyllën deri më 20 janar.

Në qendër të Uashingtonit, oficerët arrestuan një person nga Virxhinia, që u përpoq të hynte në perimetrin e Capitol Hill me një pistoletë të mbushur dhe i pajisur me mbi 500 fishekë.

Ndërkohë, ekpi i Biden ka hartuar një seri planesh për të zhbërë politikat e Trump.

Pak orë pasi të ketë hyrë në Shtëpinë e Bardhë, Biden do të ndërmarrë një seri veprimesh ekzekutive për të shënuar një shkëputje të qartë nga politikat e administratës së paraardhësit të tij.