60 mijë turistë në 6 muaj, vizitorët e huaj tërhiqen nga Kalaja e Gjirokastrës

Kalaja e gurtë e Gjirokastrës edhe pas përfundimit të Festivalit Folklorik Kombëtar vazhdon të vizitohet nga një numër në rritje turistësh vendas dhe të huaj.

Gjatë muajit qershor ky monument me vlera të rralla historike dhe ndërtimore është vizituar nga rreth 20 mijë turistë 60% e të cilëve ishin të huaj. Ata vijnë nga Italia, Spanja, Gjermania dhe SHBA-ja ndërsa shprehen të impresionuar për historikun dhe mënyrën e ndërtimit të kalasë së Gjirokastrës.

“Është e mrekullueshme, një kështjellë madhështore, është bukur ta vizitosh. Shumë gjëra për t’u parë”, thotë një turist italian.

“Unë jam nga Holanda dhe me të vërtetë më pëlqen që ndodhem këtu. Është një vend i veçantë  dhe me këto ndërtime të bukura përreth”, shprehet një turiste.

Afërsia gjeografikë me bregdetin e Sarandës bën që gjatë periudhës së verës, Kalaja e gurtë të jetë një ndër pikat më të preferuara në guidat turistike rajonale dhe më gjerë.

“Është një nga kalatë më të preferuara për këtë periudhë, duke qenë se bëhet një kombinim edhe me pjesën e qytetit të Sarandës, që frekuenton edhe pjesën e plazhit, por edhe pjesën historike dhe kulturore të qytetit të Gjirokastrës. Kështu që edhe në sajë të festivalit që u bë në qytetin e Gjirokastrës pati një bujë shumë të madhe të turistëve të huaj dhe shqiptarë, që erdhën për të vizituar kalanë e Gjirokastrës”, thotë Arbeni, guidë turistike.

Përgjatë këtij viti kalaja e Gjirokastrës ka mirëpritur rreth 60 mijë vizitorë, duke u kthyer në një aset me vlera për trashëgiminë kulturore por edhe zhvillimin e turizmit.

Për të ndjekur kanalin e youtube të Euronews Albania KLIKO KËTU! 

LEXONI GJITHASHTU:

• Çel siparin Festivali Folklorik Kombëtar Gjirokastër 2023
• Festivali Folklorik Kombëtar i Gjirokastrës, vlerë e traditës dhe turizmit