Forumi Rinor i PD kundër përjashtimit të Berishës, kërkon referendum të brendshëm

Forumi Rinor i Partisë Demokratike kërkon referendum të brendshëm lidhur me çështjen Berisha.

Anëtarët e kryesisë së FRPD kanë nisur mbledhjen e firmave për mbajtjen e referendumit për përjashtimin e Sali Berishës nga grupi parlamentar i PD.

Deri tani janë 30 anëtarë të kryesisë që kanë hedhur firmat, mes tyre edhe djali i Sokol Olldashit, Glauk Olldashi.

“Po ju drejtohemi nëpërmjet këtij peticioni lidhur me situatën e papredentë të krijuar nga vendimi personal i kryetarit të Partisë Demokratike për përjashtimin nga grupi të deputetit Profesor Doktor Sali Berisha. Duke e konsideruar këtë veprim në shkelje të plotë të statusit, parimeve, vlerave të Partisë Demokratike si dhe rrezikun që mbart për përçarjen e thellë dhe të parikuperueshme të saj kërkojmë që ky veprim t’i nënshtrohet me domosdoshmëri një referendumi në anëtarësinë e partisë, si të vetmen rrugë për të ruajtur unitetin e PD”, thuhet në kërkesën e kryesisë së FRPD.

Përjashtim i ish-kreut të PD, Sali Berisha nga grupi demokrat një ditë para seancës së parë të Kuvendit të ri solli përçarje brenda Partisë Demokratike.

Vendimi i kryetari Basha u përshëndet menjëherë nga ambasada e SHBA. Përmes një deklarate për mediat ambasada amerikan thekson se PD-ja ka guximin të shkëputet nga e kaluara për të ndërtuar të ardhmen dhe se vendimi i Bashës meriton respekt.