Përjashtimi i Berishës, Tritan Shehu: PD është futur në një spirale të rrezikshme

Deputeti i zgjedhur i Partisë Demokratike, Tritan Shehu tha se PD është futur në një spirale të rrezikshme pas vendimit të kryedemokratit Lulzim Basha për të përjashtuar nga grupi ish-kreun e kësaj partie, Sali Berisha.

Sipas z. Shehu, e vetmja rrugë për ta nxjerrë PD nga kjo situatë e vështirë edhe pas zgjedhjeve të 25 prillit është respektimi i statutit, rregullave të brendshme të demokracisë dhe gjithëpërfshirjes në vendimmarrje të të gjitha strukturave brenda saj.

“Mendoj se detyra e një force demokratike është të vërë rregulla demokratike brenda saj, është baza nga fillon gabimi kur nuk respektohen ato”, tha z. Shehu.

Teksa e vlerësoi si partnerin strategjik të Shqipërisë, z. Shehu tha se SHBA nuk ka kërkuar të mos respektohen rregullat e demokracisë, sa i përket çështjes Berisha.

“Ata gjëja e parë që kërkojnë është respektimi i rregullave të demokracisë. Dhe mos mendoni se SHBA thotë mos respekto rregullat e demokracisë. Duke respektuar këto rregulla, do krijojmë më shumë respekt për SHBA, që janë partneri jonë strategjik”, tha deputeti i zgjedhur i PD.

Sipas tij Berisha ka të drejtë të kërkojë të drejtën e tij dhe ideja e referendumit duhet parë për të vendosur për gjëra kaq të rëndësishme.