Balluku: Brenda këtij mandati përfundon porti i ri i Durrësit, në nëntor nis puna për aeroportin e Vlorës

Ministrja e Infrastrukturës dhe Energjisë, Belinda Balluku deklaroi sot në Kuvend se porti i ri ndërkombëtar i Durrësit, i vendosur në zonën e Porto Romanos do të dorëzohet brenda këtij mandati.

Ministrja u zotua se porti tregtar i Vlorës do të vendoset në zonën Triportit.

“Porti i Vlorës është një port që ndryshon destinacion për t’u lidhur me vazhdimin e Lungomares dhe kthehet në një port jahtesh. Ndërsa, porti tregtar do të zhvendoset në zonën e Triportit, duke krijuar atje një port të integruar”, tha znj. Balluku.

Ajo shtoi se brenda muajit nëntor nis puna në kantierin e Aeroportit Ndërkombëtar të Vlorës, i cili do të përfundojë brenda këtij mandati.

Znj. Balluku theksoi se projektet e papërfunduara gjatë 9 viteve të fundit, do të përfundojnë brenda këtij mandati.

“Projekte të tjera që do të përfundojnë është Unaza e Madhe e Tiranës, ndodhen drejt përfundimit të gjitha lotet edhe ato që kemi trashëguar prej 9 vitesh të papërfunduara, por edhe lotet e reja që u hapën më pak se 1 vit e gjysmë më përpara janë drejt perëndimit”, shtoi ajo.

LEXONI GJITHASHTU:

• Rama i drejtohet PD-së: Jemi gati për çdo lëshim që ju doni
• Rama: Gjuha angleze që në klasë të parë duke filluar nga ky vit shkollor