Premier League, ndalet Manchester City, Liverpool merr kryesimin

Liverpool mori sot kryesimin e kampionatit anglez duke përfituar nga ndalesa e Manchester City-it.

Të kuqtë e Jurgen Klopp fituan 3-0 ndaj Crystal Palace, ndërsa skuadra e Pep Guardiolës u ndal 0-0 nga Southampton.

Në Anfield, Mane, Salah dhe Keita vulosën suksesin e radhës për Liverpoolin që shkon në kuotën e 13 pikëve në 5 javë Premier League. Për afrikanin Mane, pasditja e sotme shënoi golin e 100-të me fanellën e Liverpoolit.

Ndërkohë në sfidën tjetër kundër Southamptonit, më shumë se rezultati zhgënjeu fakti se City nuk goditi asnjëherë kuadratin e portës deri në minutën e 90-të.

Për Southamptonin u dha një penallti kur Kyle Walker rrëzoi Adam Armstrongun në zonë. Por vendimi u kthye pas konsultimit me videoasistencën. Ngjashëm u anulua edhe goli i realizuar në fund nga City pasi rezultoi pozicion jashtë loje.

Prej minutës së 68-të në fushë u pa dhe sulmuesi i kombëtares Armando Broja.

Me barazimin 0-0 City humbi mundësinë për të mbajtur ritmin e kreut, ndërsa Southampton regjistroi kështu barazimin e katërt radhazi.

Nga ndeshjet e tjera, Arsenali fitoi 1-0 ndaj Burnley, Watford 3-1 ndaj Norwich dhe Brentford 2-0 ndaj Wolves.