Erion Braçe reflekton për marrëdhënien me pushtetin: Një përvojë e çuditshme

Erion Braçe pas dorëzimit të detyrës së zv.kryeministrit, post të cilin e mbajte që prej dhjetorit 2018, ka bërë një shënim të gjatë në profilin e tij në Facebook.

Deputeti i PS bën një reflektim mbi marrëdhënien me pushtetin, ku thekson se ka kaluar “një përvojë të çuditshme”.

Braçe thotë se pranoi të merrte këtë detyrë nga “dëshira për t’u shërbyer njerëzve” por thekson se kjo gjë ishte e pamundur pasi “iu kufizua” dhe ai e krahason postin me “dezhurnin në gjimnaz”.

“Një përvojë e çuditshme pushteti, karrigeje, e komplikuar, që as e doja e as e kërkova, ma kërkuan, as e pranova si të tillë e as më pranoi”, shkruan ai.

Deputeti socialist thotë se ndonëse siç e kërkon ligji ai ka firmosur formalisht vendime të Këshillit të Ministrave për shkak të kryesimit të mbledhjes së qeverisë në mungesë të Edi Ramës, thekson se edhe në këto raste ka dhënë mendimin e tij kundër.

Ai thotë se largohet nga posti i zv.kryeministri i pa etiketuar si “hajdut” duke shtuar se “të vjedhësh është çështje vullneti”.

Braçe tregon se në varësi të zyrës së tij ka pasur 5 punonjës edhe pse për nga hierarkia detyra e tij është pas kryeministrit.

Ish-zv.kryeministri e mbyll shkrimin e tij duke thënë se ka njerëz që prisnin shumë më tepër nga ai dhe i kërkon ndjesë kujtdo që u zhgënjye.

Shkrimin, Braçe e ka shoqëruar me një video ku tregon zyrën e tij të punës. Bie në sy prezenca e një kornize me faqen e parë të gazetës “Zëri i Popullit” që e ka drejtuar për shumë vite si dhe disa libra mes të cilëve dhe një me titull “Vrasja e një Kryeministri” ndërsa karrigia qëndron e rrëzuar.

Erion Braçe është një prej deputetëve më jetëgjatë të PS, pasi nuk mungon në Parlament që prej vitit 1992.

Ai është zgjedhur sërish anëtar i Kryesisë së PS, ku bën pjesë që prej vitit 2005.

Për shumë vite Braçe ka qenë deputet i zgjedhur në Berat, ndërsa prej 2013 është zgjedhur dy legjislatura deputet në Qarkun e Fierit.

Në qeverinë e re “Rama 3”, postin që mbante Braçe, e ka marrë Arben Ahmetaj, i cili përveç zv.kryeministër do të jetë dhe Ministër i Shtetit për Rindërtimin dhe Programin e Reformave.