Mbi 100 të arrestuar në Spanjë për pastrim parash, drogë dhe armë

Policia spanjolle dhe ajo italiane njoftuan të hënën shkatërrimin e një grupi kriminal, aktiv në pastrimin e parave për llogari të organizatave mafioze italiane, duke arrestuar 106 persona.

Sipas njoftimit të autoriteteve iberike, grupi kishte arritur të siguronte miliona euro përmes skemave të mashtrimit online.

Shumica e të arrestuarve janë shtetas italian dhe pjesa dërrmuese e tyre u arrestuan në ishullin spanjoll Tenerife, bëri të ditur Europol në një deklaratë.

Sipas burimeve, të dyshuarit mashtronin viktimat, gjithashtu shtetas italianë, duke i shtyrë të dërgonin shuma të mëdha parash në banka spanjolle të kontrolluara prej tyre.

Më pas, paratë pastroheshin përmes blerjeve me kripto-valutë, ose investoheshin në aktivitete të tjera kriminale si trafik droge, armësh dhe prostitucion.

Vetëm vitin e kaluar, grupi kriminal kishte fituar 10 milionë euro nga aktivitetet e tij të paligjshme.

Anëtarë të organizatës, që shpesh herë përdornin dhunën për të frikësuar viktimat dhe për t’u zhvatur para bizneseve dhe njerëzve, kishin depërtuar në sektorë të ndryshëm të shoqërisë spanjolle, përfshirë atë bankar dhe në studio ligjore.

Gjatë operacionit, policia spanjolle dhe ajo italiane ngrinë 118 llogari bankare dhe sekuestruan 224 karta krediti, si dhe një plantacion marijuane.