Dita Ndërkombëtare e Paqes, Rama e Meta kujtojnë misionet paqeruajtëse

Kryeministri Edi Rama dhe Presidenti Ilir Meta kujtuan sot me rastin e “Ditës Ndërkombëtare të Paqes” misionet paqeruajtëse të Shqipërisë dhe në veçanti ushtarët e rënë në detyrë.

Përmes një postimi në Facebook, Rama tha se “Shqipëria ka kontribuuar dhe do të vazhdojë të jape kontributin e saj në misione paqëruajtëse anembanë globit”.

“Kjo ditë na rikujton se ka më shumë gjëra që na bashkojnë se sa ato që mund të na ndajnë,” – shkroi Rama.

Ndryshe Presidenti Meta e përqendroi vëmendjen te të rënët në krye të detyrës. Ai kujtoi ushtarakët Zarife Hasanaj, Klodian Tanushi dhe Feti Vogli, të cilët humbën jetën gjatë misioneve të NATO-s.

“Në Ditën Ndërkombëtare të Paqes nderojmë sot kujtimin e paharruar të Dëshmorëve të Atdheut,” – shkroi Meta duke iu referuar ushtarakëve të ndjerë.

“Shqipëria duhet të vijojë me dinjitet, angazhimin dhe kontributin e saj për ruajtjen e paqes, sigurisë dhe stabilitetit në rajon dhe kudo tjetër, duke dhënë në radhë të parë shembullin e vet për ruajten e vlerave dhe parimeve, që përfaqëson NATO, në zemër të së cilës është demokracia,” – vjoi Presidenti.

Dita Ndërkombëtare e Paqes është caktuar nga Organizata e Kombeve të Bashkuara të jetë më 21 shtator. Ajo i kushtohet paqes në botë, veçanërisht shmangies së dhunës apo luftës. Ndaj për këtë shpesh në këtë datë aplikohet armpushim në vendet ku ka konflikte.

Për herë të parë “Dita Ndërkombëtare e Paqes” u celebrua për herë të parë në vitin 1981.