Eksperti i sigurisë në Kosovë: Provokimet në kufi janë të pritshme

Mbledhja e Këshillit të Sigurisë të Serbisë nga presidenti Vuçiç, si dhe afrimi në kufi i autoblindave të Forcave Speciale të Kosovës, kanë qenë sinjale të qarta se asnjëra nga palët nuk do të lëshojë mbi vendimin për zëvendësimin e targave serbe kur hyjnë në Kosovë.

Për ekspertin e sigurisë, Nuredin Ibishi, një vendimi në kuadër të reciprocitetit duhej marrë prej kohësh, çka normalisht do të pasohej me masa nga e Serbisë.

“Realisht është dashur edhe më herët të merren këto masa, me qëllim që të bëhet një baraspeshë në ndërmarrjen e veprimeve ndaj atyre që po bën Serbia”, tha ai.

Ibishi shkon më tej, duke theksuar se politika dhe veprimet e ndërmarra nga Serbia, janë tërësisht nën ndikimin rus, çka është konstatuar edhe herë të tjera.

“Ekziston ndikimi rus, nuk është kjo e rastësishme që po ndodh. Ajo që ndodhi edhe në Mal të Zi për shkak të ndikimit serbo-rus, dhe kjo është e ndërlidhur”, tha ai.  

Duke u nisur nga rastet e fundit të incidenteve me Serbinë, Ibishi shprehet se gjithçka do të ngelë në kuadër të provokimeve, pasi presidenti Vuçiç përveç pamundësisë reale të ndërhyrjes ushtarake, do të marrë përsipër rolin e paqeruajtësit.

LEXONI GJITHASHTU:

• Petar Petkoviç për ‘reciprocitetin e targave’: Populli serb nuk do rrijë i heshtur
• Vuçiç reagon për reciprocitetin e targave me Kosovën
• Lista Serbe në Kosovë e shqetësuar për targat: Kërcënim i drejtpërdrejtë, Vuçiç të reagojë