Policia shkon të arrestojë Adriatik Llallën, por nuk e gjen në banesë

Policia e Shtetit ka shkuar mbrëmjen e sotme në shtëpinë e ish-kryeprokurorit Adriatik Llalla për të ekzekutuar urdhrin e SPAK për arrestimin e tij.

Efektivët e policisë kanë hyrë brenda banesës së ish-kryeprokurorit ku kanë qëndruar për disa minuta nga ku kanë dalë duarbosh, pasi Llalla nuk ndodhej aty. Sipas burimeve, ish-kryeprokurori është larguar nga Shqipëria 1 javë më parë.

Pas vendimit të Gjykatës së Posaçme të Apelit për të lënë në fuqi dënimin me 2 vjet burg për ish-kryeprokurorin Adriatik Llalla, SPAK ka nxjerrë urdhrin për ekzekutimin e këtij vendimi nga policia e shtetit.

“Bazuar në faktin se vendimi i mësipërm i Gjykatës së Posaçme të Apelit për Korrupsionin dhe Krimin e Organizuar është i formës së prerë, Prokuroria e Posaçme kundër Korrupsionit dhe Krimit të Organizuar ditën e sotme, me datë 22.09.2021 ka nxjerrë urdhrin për ekzekutimin e këtij vendimi penal, duke ngarkuar Policinë e Shtetit për ekzekutimin e tij”, thuhet në njoftimin e SPAK.

Llalla bëhet i pari ish-zyrtar i lartë i drejtësisë që dënohet me burg. Në vitin 2018 Llalla u përfshi në listën e personave “non grata” nga SHBA. Atij dhe familjarëve të tij iu ndalua udhëtimi për në Shtetet e Bashkuara.

Referuar dosjes hetimore të SPAK, ish-kryeprokurori dyshohet të mos ketë deklaruar pasuri në tre episode.

Më konkretisht ai ka fshehur një shumë prej 7400 dollarë të shpenzuara në SHBA, për lindjen e djalit të tij. Episodi tjetër është një shumë për ndërtimin e një banese, ndërsa episodi i tretë ka të bëjë me disa shpenzime të kryera në Gjermani, për shkollimin e vajzës.

LEXONI GJITHASHTU:

• 2 vite burg ish-kryeprokurorit Llalla, mbetet në fuqi vendimi
• Rënia e një kryeprokurori: Kush është Adriatik Llalla, nga akuzues në i akuzuar