Ndryshimet kushtetuese për Vettingun, Balla: Rekomandojnë ndërkombëtarët,  PD ende pa vendim

Zgjatja e mandatit të organeve të Vettingut përtej 17 qershorit, kur është edhe afati final i funksionimit të tyre, kërkon bashkëpunim mes PS-së dhe PD-së në Parlament.

Nga Partia Socialiste ka pasur disa herë ftesa për ulje në tryezën e dialogut, ndërsa nga Partia Demokratike ende nuk ka një vendim për këtë çështje.

Në dalje nga seanca plenare, sekretari i përgjithshëm i Partisë Demokratike, Gazment Bardhi e evitoi përgjigjen për këtë çështje, duke theksuar se për momentin janë të tjera probleme si primare.

“Në një parlament ku në shkelje flagrante të rregullores së Kuvendit synohet t’i iket syve të publikut, t’i shmangesh transparencës dhe t’i mbyllësh gojën opozitës, pa diskutim që nuk mund të flitet për bashkëpunim, qoftë ky edhe institucional,” – u shpreh ai.

Nga ana tjetër, kreu i grupit parlamentar të Partisë Socialiste, Taulant Balla, i cilësoi ndryshimet kushtetuese të rëndësishme në mënyrë që të mos pengohet procesi i Vettingut.

“Ka qenë një rekomandim i atyre që monitorojnë Reformën në Drejtësi, partnerët e Shqipërisë, EURALIUS dhe OPDAT. Të mos harrojmë që ka pasur dhe një vlerësim nga Komisioni i Venecias për nevojën e barazisë në një proces për të gjithë magjistratët. Është rekomanduar që ashtu siç janë vetuar magjistratët e parë të kalojnë dhe magjistratët e mbetur,” – tha Balla.

Procesi i Vettingut do të jetë testi i parë nëse do të ketë bashkëpunim parlamentar mes Partisë Demokratike dhe asaj Socialiste.

LEXONI GJITHASHTU: 

• Mbledhjet e komisioneve online, Bardhi: Vendimmarrje për t’i mbyllur gojën opozitës
• Partitë bien dakord, vaksina kundër COVID-19 e detyrueshme për deputetët
• Kuvendi miraton komisionet parlamentare, PS-PD të ndara për mënyrën e zhvillimit