‘Mbledhja e dy qeverive në nëntor’, Kurti: Të rrisim bashkëpunimin për mirëqenien e shqiptarëve

“Duhet të rrisim bashkëpunimin për drejtësi, barazi, zhvillim dhe mirëqenien për shqiptarët në të dy anët e kufirit dhe në të gjithë rajonin”.  Kështu u shpreh kryeministri Albin Kurti në konferencën e përbashkët me kryeministrin Edi Rama.

Ai theksoi se dy qeveritë kanë mundësi dhe potencial për të realizuar projektet që priten nga qytetarët e dy vendeve.

Kurti shtoi se duhet të ketë një bashkëpunim të ngushtë edhe në tregun e mallrave.

“Biseduam për të gjithë fushat e qeverisjes sonë dhe në veçanti u zotuam që e shohim tejet të rëndësishëm koordinim dhe sinkronizimin gjithandej. Biseduam edhe për avancimin e marrëveshjeve ekzistuese”, u shpreh Kurti.

Ai tregoi se mbledhja e ardhshme e dy qeverive pritet të zhvillohet në gjysmën e dytë të muajit nëntor.

“Gjithashtu u dakorduam që të kemi një sekretariat koordinues për marrëdhëniet tona bilaterale që do të udhëhiqet nga Gentian Sala”, përfundoi ai.

LEXONI GJITHASHTU:

• LIVE| Rama në Kosovë, nis takimi me Albin Kurtin
• Rama pranon ftesën e Kurtit për të vizituar Kosovën