Bota në sfidë me COVID-19, përfaqësuesi i OBSH-së në Shqipëri mesazh bluzave të bardha

Kreu i Organizatës Botërore të Shëndetësisë në Shqipëri, Raul Gonzales, ka përçuar një mesazh falënderimi për personelin mjekësor, të cilët vijojnë punën në vijnë e parë kundër pandemisë globale të COVID-19. Data 7 prill kremtohet si Dita Botërore e Shëndetit, ditë kjo e cila këtë vit u kushtohet infermierëve dhe mamive në të gjithë botën. Përfaqësuesi i OBSH-së në Shqipëri tha se sot janë më shumë se 7 milionë infermierë në rajonin europian, të cilët po japin kontributin e  tyre për të realizuar mbulimin universal shëndetësor.

“Sot, në 7 prill, kremtojmë Ditën Botërore të Shëndetit, e cila këtë vit iu kushtohet Infermierëve dhe Mamive. Me më shumë se 7 milionë infermierë në Rajonin Europian, kontributi i tyre për të realizuar Mbulimin Universal Shëndetësor është i një rëndësie të veçantë, realisht i pazëvendësueshëm. Dhe për këtë, ju shpreh mirënjohjen dhe vlerësimin tim të thellë!”, tha Gonzales.

Në mesazhin e tij të shpërndarë në rrjetin social “Facebook”, përfaqësuesi i OBSH-së në vendin tonë thotë se bota po përballet me një prej sfidave më të mëdha, siç është ajo e pandemisë COVID-19.

“Këtë vit, po përjetojmë një nga sfidat më të mëdhaja, me të cilat njerëzimi është përballur për dekada me radhë. Infermierët po kontribuojnë, madje edhe me jetën e tyre, në luftën kundër Covid-19. Ata po kujdesen më së miri për ata që kanë nevojë, jo vetëm për sa i përket gjendjes fizike, por po aq e rëndësishme edhe për shëndetin e tyre mendor. Nga thellësia e zemrës sime, faleminderit dhe 1 milion herë shumë faleminderit për profesionalizmin, humanizmin dhe angazhimin tuaj”, thuhet në mesazhin e tij.