Krimet e rënda po ndodhin prej të metave në sistemin penal, thotë eksperti

Eksperti i kriminalistikës Ervin Karamuça është i mendimit se krimet e rënda që po ndodhin në Shqipëri po vijnë si rrjedhojë e të metave që ka prej vitesh sistemi penal.

Karamuça e shprehu këtë mendim gjatë emisionit “Now” me Erla Mëhillin në Euronews Albania. Ai mori shkas nga vrasja e nënkomisarit Saimir Hoxha nga 21-vjeçari Aldi Rama për të kujtuar të ashtuquajturat “4 cikle kriminologjike shqiptare”.

Për ciklin e parë Karamuça tha se bëhet fjalë për “ciklin familjar” që ka dështuar.

“Këtij autorit [Aldi Rama] i ka dështuar, sepse i janë divorcuar prindërit… ka pasur trauma,” – konkretizoi eksperti.

Për ciklin e dytë Karamuça përmendi “ciklin e mbështetjes sociale”, që nënkupton kontrollin, dhe mbështetjen nga institucionet. Eksperti kujtoi se institucionet mund ta kishin drejtuar më mirë në jetë 21-vjeçarin me edukim, mbështetje sociale, apo dhe profesionalizim.

Në ciklin e tretë Karamuça përmendi “ciklin e kriminalitetit”, faktin se Rama ishte përsëritës në shkeljen e ligjit, kishte hyrë dhe dalë nga burgu dhe pavarësisht kësaj nuk kishte mbikëqyrje apo më shumë vëmendje ndaj tij.

“I katërti më pas, është cikli i drejtësisë penale, kemi bërë reformë në drejtësi por jo në drejtësi penale, të gjitha këto krime që kanë ndodhur janë si pasojë e të metave që çalojnë në të gjithë këtë sistem penal që kemi sot,” – theksoi Karamuça.