PD dorëzon në Kuvend kërkesën për hetimin e ‘Beketit’ dhe ‘Inceneratorëve’

Partia Demokratike dorëzoi sot kërkesën në kuvend për ngritjen e një komisioni hetimor për inceneratorët dhe një për çështjen Becchetti.

Fillimisht ishte deputetja e PD, Jorida Tabaku e cila dorëzoi kërkesën për komisionin hetimor për inceneratorët, anëtarë të të cilit do të jenë Luçiano Boçi, Belind Këlliçi, Lefter Gështenja, Dhurata Çupi, Edmond Spaho dhe Jorida Tabaku.

Ky komision do të hetojë atë që PD e cilëson ‘aferën korruptive të inceneratorëve’.

“Të gjithë e keni ndjekur çështjen e inceneratorëve, që qeveria në shkelje të ligjit i ka dhënë një projekt korruptiv një kompanie pa asnjë lidhje, 10 vjet në një qytet, 30 vjet në qytetin e Tiranës. Në këtë projekt janë shkelur ligji i konkurrencës dhe duke vendosur të gjithë qeverinë në shërbim të një biznesi të vetëm”, tha deputetja e PD.

Pak më vonë, deputetja Grida Duma dorëzoi në kuvend kërkesën për ngritjen e komisionit hetimor për çështjen ‘Becchetti’.

“Opinioni publik është i mirënjohur me dëmin që i ka shkaktuar vendit humbja e gjyqit ndërkombëtar. Janë 120 ml euron që shqiptarët duhet t’i paguajnë një kompanie private. Ky komision ka në fokus kontrollin e ligjshmërisë së veprimeve dhe mosveprimeve të funksionarëve publikë ndaj këtij dëmi”, tha deputetja e PD.

Një ditë më parë, deputeti demokrat Enkelejd Alibeaj dorëzoi në Kuvend kërkesën për ngritjen e komisionit hetimor për zgjedhjet e 25 prillit.

LEXONI GJITHASHTU:

• Emrat e anëtarëve që propozon PD për në Komisionin Hetimor për 25 prillin
• Zgjedhjet, inceneratorët dhe ‘Becchetti’ fushëbetejat e PD në Parlament