PS kundër komisionit për Becchettin, pranon hetim për zgjedhjet dhe inceneratorët

Mazhoranca nuk do të votojë për ngritjen e komisionit hetimor për çështjen Becchetti të kërkuar nga Partia Demokratike.

Kreu i grupit parlamentar socialist, Taulant Balla deklaroi se për këtë çështje janë konsultuar edhe me Avokatin e Shtetit, i cili përfaqëson Shqipërinë në këtë proces dhe është sugjeruar që të shtyhet.

“Unë mendoj që kjo kërkesë bie në kundërshtim me interesat e Shqipërisë në raport me disa procese ligjore, gjyqësore që po zhvillon Shqipëria”, deklaroi Balla.

Ndërsa për dy komisionet e tjera, atë për inceneratorët dhe zgjedhjet e 25 prillit, mazhoranca votojë pro, por do të kërkohet që të riformulohet objekti i hetimit.

“Mjafton të ketë disponibilitet nga grupi parlamentar të Partisë Demokratike dhe besoj që jemi shumë pranë gjetjes së një formulimi i cili në radhë të parë duhet të respektojë parimet e prezunimit të pafajësisë. Pra, në rast se PD që pretendon se në zgjedhjet e 25 prillit ka patur masakër zgjedhore këtë nuk mund ta pranoj dhe unë”, u shpreh kreu i grupit të PS.

Balla paralajmëroi gjithashtu se në seancën e 14 tetorit, mazhoranca do t’i rrëzojë dekrete e presidentit për buxhetin.