Nga nesër në 13:00 deri të hënën në 05:00 gjithçka e mbyllur, Rama: Hera e fundit, nga java tjetër do lëvizni më gjatë

Kryeministri Edi Rama ka njoftuar, se si çdo fundjavë, nga nesër në orën 13:00 deri në hënën në orën 05:00 do të vijohet me izolimin total, pasi çdo gjë do të jetë e mbyllur në kuadër të masave për parandalimin e përhapjes së virusit COVID-19.

Ndërkohë, kreu i qeverisë sqaron se duke nisur nga e hëna do të fillojë lehtësimi i masave me shtrirje të fashës orare të lëvizjeve deri në orën 17:30.  

“Nesër është dita e fundit me fashën orare deri në 13.00. Nga nesër në 13.00 deri të hënën në 05.00 gjithçka do të jetë e mbyllur dhe të gjithë në shtëpi. Nga e hëna, fasha orare do të zgjatet deri 17.30 dhe autorizimet për leje-dalje për pazar do të jenë 90 minuta. Pak nga pak dhe me durim, do të dalim me kokën lart nga kjo luftë”, shkruan Rama.

Paraditen e sotme kryeministri lajmëroi planet e qeverisë për lehtësimin e masave shtrënguese të ndërmarra për të kufizuar përhapjen e coronavirusit, teksa tha se duke u nisur nga e hëna do të shtrihet aktiviteti për marketet, bankat dhe farmacitë.