Protestuesit kundra projektit të Zvërnecit mblidhen në bulevard, mbajnë 1 minutë heshtje për policin e vrarë në Maliq

Qytetarë dhe aktivistë u mblodhën këtë të enjte në Bulevardin “Dëshmorët e Kombit” në protestën e pestë radhazi kundër projektit për ndërtimin e një resorti turistik në zonën e mbrojtur të Zvërnecit.

Tubimi nisi pranë Sheshit Skënderbej dhe vijoi me marshimin drejt Kryeministrisë, ku pjesëmarrësit shprehën kundërshtimin e tyre ndaj projektit, për të cilin ata thonë se rrezikon një nga zonat më të rëndësishme natyrore dhe mjedisore të vendit.

Në nisje të protestës, pjesëmarrësit mbajtën një minutë heshtje në nderim të efektivit të Policisë së Shtetit që humbi jetën në krye të detyrës në Maliq. Organizatorët shprehën ngushëllimet për familjen e viktimës dhe kolegët e tij, duke e cilësuar ngjarjen një humbje të rëndë.

“Zëri ynë, dinjiteti ynë, e ardhmja jonë”, ishte slogani i protestës, e cila vjen pas katër tubimeve të mëparshme të organizuara nga qytetarë dhe përfaqësues të shoqërisë civile.

Protestuesit kërkojnë rishikimin e projektit dhe garanci për mbrojtjen e ekosistemit të Zvërnecit, ndërsa kanë bërë thirrje për më shumë transparencë nga institucionet lidhur me investimin e planifikuar dhe ndikimin e tij në mjedis.