Yuri Kim u bën thirrje grave: Mamografia shpëton jetë

Ambasadorja e Shteteve të Bashkuara të Amerikës Yuri Kim iu bashkua të premten ecjes kundër kancerit të gjirit “Fjongo Rozë më Kujton”, me udhëheqëse shqiptare, të mbijetuara të kancerit të gjirit, dhe aktivistë komunitetesh.

Në Muajin e Ndërgjegjësimit për Kancerin e Gjiritm përmes një postimi në rrjetet sociale, ambasadorja ua rikujtoi grave dhe vajzave që mund të zbulojnë kancerin sa më shpejt dhe të jetojnë jetë të shëndetshme.

“Prandaj shpresoj që të gjitha ne do ta bëjmë mamografinë. Nuk është e këndshme por duhet ta bëni! Dhe shpresoj që të gjitha ne të nxisim mikeshat tona, mamatë tona, motrat tona, gjyshet tona, vajzat tona që të bëjnë një mamografi”, u tha Ambasadorja Kim.

Ambasadorja Kim tha se kjo sëmundje nuk do t’ia dijë “sa sa pasur je, nuk do t’ia dijë ku jeton, nuk do t’ia dijë nëse je e lumtur apo e trishtuar, ajo i ndodh të gjithave ne, mund t’i ndodhë të gjithave”.

Ambasada e Shteteve të Bashkuara thotë se me krenari ka mbështetur këtë aktivitet për 13 vjet dhe se synon fuqizimin e grave nëpërmjet shëndetit.

Sipas Organizatës Botërore të Shëndetit, kanceri i gjirit është kanceri më i shpeshtë i diagnostikuar në nivel global.

Në Shqipëri, kjo sëmudje prek 700 gra dhe vajza çdo vit, dhe një e treta e tyre vdesin.