​Kurti dhe ambasadorët e akredituar në Kosovë flasin për pakon emergjente

Z. Kurti u takua me ambasadorët e shteteve të QUINT-it dhe shefen e Zyrës së Bashkimit Evropian në Kosovë, përkatësisht me ambasadorin e Shteteve të Bashkuara të Amerikës, Philip Kosnett, ambasadorin e Gjermanisë, Christian Heldt, ambasadoren e Francës, Marie-Chrisitine Butel, ambasadorin e Britanisë së Madhe, Nicholas Abbott, ambasadorin e Italisë, Nicola Orlando, dhe përfaqësuesen e posaçme të Bashkimit Evropian në Kosovë, Nataliya Apostolova.

Sipas një komunikate të qeverisë, kryeministri në detyrë i njoftoi ambasadorët mbi situatën në vend pas përhapjes së virusit COVID-19 dhe masat e ndërmarra deri më tani nga Qeveria.

“Theks i veçantë u vë mbi pakon fiskale emergjente të hartuar nga qeveria në detyrë. Ambasadorët dhanë vlerësimet e tyre pozitive për punën e qeverisë dhe institucioneve të Republikës së Kosovës në ballafaqimin me pandeminë COVID 19, dhe në të njëjtën kohë shprehën gatishmërinë dhe vullnetin për ta ndihmuar Republikën e Kosovës në çfarëdo forme”, thuhet në komunikatë.

Gjithashtu, kryeministri Kurti shprehu falenderimet dhe mirënjohjen për ndihmën e vazhdueshme që komuniteti ndërkombëtarë po i jep Kosovës për menaxhimin dhe tejkalimin e kësaj sfide të përbashkët.