Viktima në Peqin, ish-anëtar i bandës së Lushnjës

Personi i gjetur i vrarë me armë zjarri në lagjen Çezmë në Peqin, në afërsi të lumit Shkumbin quhet Alban Semaku.

38-vjeçari, banues në Lushnjë deri në vitin 2011 mbante emrin Elton Mermali dhe njihet si ish-anëtar i bandës së Lushnjës.

Në vitin 2015, viktima është arrestuar në flagrancë pasi ka kërcënuar me armë një qytetar për motive të dobëta. Nga kontrolli asokohe, Semakut iu gjetën një pistoletë, një krëhër pistolete me 6 fishekë dhe dy doza heroinë. Nga ky rast është dënuar me 6 vjet e 8 muaj burg.

Policia ka bërë me dije se në vitin 2006 Semaku është ekstraduar nga Italia pasi Gjykata e Lushnjës ka caktuar vendimin arrest me burg për vrasje.

Burime për Euronews Albania konfirmojnë se një natë më parë një grua ka denoncuar në Policinë e Lushnjës se burri i saj nuk ka shkuar në shtëpi.

Trupi i pajetë i 38-vjeçarit është gjetur nga banorë të zonës dhe fotoja e tij i është dërguar komisariatit të Policisë Lushnjë. Identifikimi i kufomës në morg është bërë nga e ëma.

LEXONI GJITHASHTU: 

• Gjendet një person i vrarë me armë zjarri në Peqin